Confensiwn Arfau Cemegol

Cytundeb rhyngwladol i reoli arfau yw’r Confensiwn Arfau Cemegol sydd wedi'i gynllunio i ddileu dosbarth cyfan o arfau distryw mawr. Cyflwynodd Deddf Arfau Cemegol 1996 nifer o gamau rheoli i gyfyngu ar y defnydd o gemegion a restrir yn Atodlen 1 y Ddeddf. Mae'n ofynnol i'r Brifysgol gofrestru’r stoc sydd ganddi o’r cemegion hyn yn flynyddol gyda'r Adran Masnach a Diwydiant. Gellir gweld y rhestr gyflawn o Gemegion Atodlen 1 ar .

Os yw’r Confensiwn Arfau Cemegol yn berthnasol i unrhyw gynnyrch mae’n rhaid i chi gyfeirio at wefan "Hysbysiadau Statudol" Prifysgol Bangor

RHAN 1

Cyfyngiadau ar ddefnyddio Cemegion Atodlen. Mae gweithgareddau lle defnyddir cemegion Atodlen 1 wedi'u cyfyngu i rai dibenion yn unig. Dibenion a gweithgareddau fferyllol, ymchwil a meddygol yw’r rhain sy'n ymwneud ag amddiffyn rhag cemegion gwenwynig. Ni chaniateir defnyddio cemegion Atodlen 1 i wneud unrhyw weithgareddau eraill.

RHAN 2

Trwyddedu Gweithgareddau sy'n defnyddio Cemegion Atodlen 1. Ers mis Ionawr 1997 mae bod ym meddiant, defnyddio a chynhyrchu cemegion Atodlen 1 wedi bod yn ddarostyngedig i system drwyddedu Awdurdod Cenedlaethol y Confensiwn Arfau Cemegol. Prosesir ceisiadau am y drwydded hon gan y Gwasanaethau Diogelwch a Diogelu'r Amgylchedd a chaiff ei hadnewyddu’n flynyddol. Rhaid i Golegau / Ysgolion sy'n dymuno ymgymryd â gweithgareddau a restrir yn Rhan 1 ddarparu’r wybodaeth ganlynol i’r Pennaeth Iechyd a Diogelwch yn yr adran Llywodraethu a Chydymffurfio.

  1. Enw(au) cemegyn/cemegion Atodlen 1 a'r rhif(au) CAS cysylltiedig.
  2. Uchafswm y cemegyn/cemegion Atodlen 1 a gynhyrchir yn ystod y flwyddyn galendr.
  3. Uchafswm y cemegyn/cemegion Atodlen 1 a fydd yn eich meddiant yn ystod y flwyddyn galendr.
  4. Y pwrpas penodol y defnyddir y cemegyn/cemegion Atodlen 1 ar ei gyfer.
  5. Y lleoliad a’r cyfeiriad lle bydd y cemegyn/cemegion Atodlen 1 yn cael eu cynhyrchu, eu defnyddio a'u storio.
  6. Manylion cyswllt (gan gynnwys ffôn ac e-bost) y person cyfrifol.

Noder: O dan amodau presennol y drwydded, 5 gram yw uchafswm y cemegion Atodlen 1 y gellir bod yn eu meddiant ar unrhyw adeg yn ystod y flwyddyn galendr.

Unwaith eto, os yw’r Confensiwn Arfau Cemegol yn berthnasol i gynnyrch rhaid i chi gyfeirio at wefan "Hysbysiadau Statudol" Prifysgol Bangor.

RHAN 3

Adrodd yn Flynyddol a Chadw Cofnodion

Mae'n ofynnol i adrannau sy'n gwneud gweithgareddau a restrir yn Rhan 1 adrodd yn flynyddol, erbyn 30 Medi, i'r Gwasanaethau Diogelwch a Diogelu'r Amgylchedd, faint o gemegyn/gemegion Atodlen 1 sydd yn eu meddiant. Dylid cadw cofnodion hefyd o’r cemegyn/cemegion Atodlen 1 sy’n cael eu defnyddio a’u cynhyrchu a dylent fod ar gael i'w harchwilio gan Awdurdod Cenedlaethol y Confensiwn Arfau Cemegol.

Gellir cael rhagor o wybodaeth am y pwnc hwn gan y Tîm Iechyd a Diogelwch yn yr adran Llywodraethu a Chydymffurfio.